મહિલા આચાર્યે શૌચાલય ગળાફાંસો ખાઈને કર્યો આપઘાત, 4 પાનાંની સુસાઇડ નોટ મળી આવી

છોટાઉદેપુર : જિલ્લાના નસવાડી તાલુકાની કુકરદા સરકારી માધ્યમિક શાળાના શૌચાલયમાં મહિલા પ્રિન્સિપાલે ગળેફાંસો ખાઇને આપઘાત કરતાં ચકચાર મચી ગઈ છે. નસવાડી પોલીસે મહિલાના મૃતદેહ પાસેથી 4 પાનાંની સુસાઇડ નોટ પણ કબજે કરી છે. પોલીસે મૃતક મહિલાના પતિ અને શિક્ષકોની પૂછપરછ શરૂ કરીને વધુ કાર્યવાહી હાથ ધરી છે.

પોલીસે મૃતદેહ પાસેથી 4 પાનાંની સુસાઇડ નોટ કબજે કરી                                                                         અરવલ્લી જિલ્લાના માલપુરનાં રહેવાસી ભાવનાબેન ડામોર છોટાઉદેપુર જિલ્લાના નસવાડી તાલુકાના કુકરદા સરકારી માધ્યમિક શાળામાં પ્રિન્સિપાલ તરીકે ફરજ બજાવતાં હતાં અને પતિ તથા બે બાળકો સાથે રહેતાં હતાં. ભાવનાબેન ડામોરે આજે સવારે શાળાના શૌચાલયમાં ગળેફાંસો ખાઇને આપઘાત કરી લીધો હતો. ઘટનાની જાણ થતાં જ સ્કૂલના શિક્ષકો મોટી સંખ્યામાં દોડી આવ્યા હતા અને પોલીસ તેમજ મહિલાનાં પરિવારજનોને જાણ કરી હતી. નસવાડી પોલીસે ઘટનાસ્થળે દોડી જઇને નસવાડી પોલીસે મૃતદેહ પાસેથી 4 પાનાંની સુસાઇડ નોટ કબજે કરી હતી. જોકે સુસાઇડ નોટમાં આત્મહત્યાના કારણ અંગે ઘટસ્ફોટ થાય એવી શક્યતા છે.

મહિલાના વ્હોટ્સએપમાં સવારે 10:25નું તેમનું લાસ્ટ સીન બતાવે છે                                                          પોલીસે મહિલાનાં માતા-પિતાને જાણ કરી હતી. તેનાં માતા-પિતા કુકરદા ગામ આવવા રવાના થઇ ગયા હતા. આત્મહત્યા કરનારી મહિલાના લગ્ન 10 વર્ષ પહેલાં જયદીપ ડામોર સાથે થયા હતા અને છેલ્લાં 4 વર્ષથી કુકરદા ગામમાં જ રહેતા હતા. મહિલાએ આજે સવારે 9:25 વાગ્યે બે સગાંના જન્મદિવસ હોવાથી શુભેચ્છા પાઠવી હતી અને વ્હોટ્સએપમાં સવારે 10:25નું તેમનું લાસ્ટ સીન બતાવે છે

પતિ કહે છે, 4 મહિનાથી પ્રિન્સિપાલ બન્યાં બાદ તે સ્ટ્રેસમાં રહેતી હતી                                                    આત્મહત્યા કરનારી મહિલા પ્રિન્સિપાલના પતિ જયદીપ ડામોરે જણાવ્યું હતું કે ઘરમાં કોઇપણ પ્રકારના પ્રોબ્લમ નહોતા. જોકે 4 મહિનાથી પ્રિન્સિપાલ બન્યા બાદ તે સ્ટ્રેસમાં રહેતી હતી, જેને કારણે આ પગલું ભર્યું હોય એમ લાગે છે

સુસાઇડ નોટના અંશ…                                              ‘હું ડામોર ભાવનાબેન બાબુભાઈ મારા હોશમાં રહીને આ ચિઠ્ઠી લખું છું. મારી મોત પાછળ હું પોતે જવાબદાર છું. છેલ્લા કેટલાય મહિનાથી મારી માનસિક સ્થિતિ બહુ જ ખરાબ છે મારા વિચારો મારા કન્ટ્રોલમાં જ નથી રહેતા. હું હારી ગઈ છું. મેં ઘણી હિંમત કરી આગળ વધવા માટે પણ મારું મગજ એવું ગાડું થઈ ગયું છે કે મને મરવાની પરિસ્થિતિમાંથી બહાર જ નીકળવા નથી દેતું. ભગવાને મને બધુ જ આપ્યું છે જેમનો હું આભાર માનું છું.

મારો જીવ મારા બે બાળકોમાં અને પતિમાં રહેશે. મારા પતિએ મને બધી રીતે સપોર્ટ કરી છે. બંને એક બીજાને ખૂબ પ્રેમ કરીએ છીએ. મને વિશ્વાસ છે કે મારા ગયા પછી મારા પતિ મારા બાળકોને દુઃખ નહી પડવા દે તે એમનું મારા કરતાં પણ ખૂબ સરસ રીતે ધ્યાન રાખે છે અને રાખશે. હું સૌ કોઈની માફી માગું છું જેમને મારાથી દુઃખ થયું હોય.

હું મારા પપ્પાનું અભિમાન હતી પણ સોરી પપ્પા, મને માફ કરજો. મારી પરિસ્થિતિ એટલી ખરાબ કે હું મારી લાગણીને શબ્દોમાં લખી પણ નથી શકતી. મારો અનુભવ કહું છું કે મરવાનું પણ સહેલું નથી. મારી સાસરીમાં મારે કોઈ દુઃખ નથી બધા મને સારી રીતે ખૂબ સાચવે છે. કોણ મા પોતાના બાળકોને મૂકી મરી જાય પણ મારાથી આ પગલું ભરાઈ જવાનું છે. લોકો મને શું કહેશે કેવી ગણશે એની પણ બીક લાગે છે. ભગવાનને પણ મને ઉપર જઈને જે સજા આપવી હશે તે આપશે.

આમ પણ હું ડાયાબિટીસ પેશન્ટ હોવાથી રોજ ચાર ઇન્જેક્શન લઉં ત્યારે તો જીવી રહી છું. કયાં સુધી આમ જીવવાનું હતું. મારા વ્હાલા મિત્રો અને સ્નેહીજનો પણ મારી ઓચિંતી વિદાય સ્વીકારશે નહીં પણ હું બધાની માફી માગું છું. શાળાના બધાં કાગળ બેગમાં હશે સહી સિક્કા સાથે. સાથી શિક્ષક મિત્રોને પણ કહ્યું છે કે મને માફ કરજો આ રીતે અડધામાં મારી કામગીરી અધૂરી મૂકીને જઉં છું.

ચંપા ફોઈ, આશાફોઈ, કલા કાકી, વિરલમાસી, મારા પપ્પા, મારા બાળકોને સાચવવા લાગજો. લખ્યા કરું તો પાના ભરાઈ જાય એમ છે. મને નહોતી ખબર હું મારી જીદંગીનો અંત આવી રીતે કરી દઈશ. અમુક લોકો માટે હું પ્રેરણાદાયક હતી પણ મારા આ પગલાંથી મારી જગ્યા બધાના દિલમાં શૂન્ય થઈ જશે. પોલીસ ટીમને પણ કહું છું કે મારા મોત પાછળ મારા પરિવારને જવાબદાર સમજી એમને હેરાન ન કરતાં. મારું પોસ્ટમોર્ટમ કરવાની પણ જરૂર નથી. હું જાતે જ આ પગલું ભરુ છું. મને ગામડે લઈ જવાની કંઈ જરૂર નથી અહિયાં જ મારા અંતિમ સંસ્કાર કરી દેજો. માય લવ જય, મારા પતિ, હું તમારા બધાની સૌથી મોટી ગુનેગાર છું કે આમ અધવચ્ચે બધાને છોડીને જઉં છું. લવ યુ સો મચ. મારા બાળકને સાચવજો. લિ. ડામોર ભાવનાબેન બાબુભાઇ