અનોખો વિરોધ: મહિલાઓ દ્વારા ચૂલા પર દૂધ વગરની ચા બનાવી ભાવ વધારાનો વિરોધ

સુરત: સુરતના પુણા વિસ્તારમાં ભૈયાનગર ખાતે મહિલાઓએ અનોખો વિરોધ નોંધાવ્યો હતો. કેન્દ્ર સરકાર દ્વારા ગેસ સિલિન્ડરના ભાવમાં થયેલા તોતિંગ વધારા અને સુમુલ ડેરી દ્વારા દૂધમાં થયેલા વધારાને લઇને ગૃહિણીઓ પોતાનો રોષ ઠાલવી રહી છે. ભાવ વધારાને કારણે પ્રતીકરૂપે લાકડાનો ચૂલો બનાવી દૂધ વગરની ચા બનાવીને પીધી હતી.

મધ્યમ અને ગરીબ વર્ગની આર્થિક મુશ્કેલીમાં વધારો
કેન્દ્ર સરકાર દ્વારા રાંધણગેસના ભાવમાં 25 રૂપિયાનો તોતિંગ વધારો કરી દીધો છે. જેને કારણે મધ્યમ અને ગરીબ પરિવારની ગૃહિણીઓનું બજેટ ખોરવાયું છે. એક બાદ એક થતા વધારાને કારણે મધ્યમ વર્ગની કમર તૂટી રહી છે. એક તરફ કોરોનાકાળને કારણે નાના ઉદ્યોગોની સ્થિતિ ખૂબ જ દયનીય છે. લોકો પાસે આવકના સાધનો નથી તેવા સમયે ધરખમ વધારાને કારણે મધ્યમ અને ગરીબ વર્ગની આર્થિક મુશ્કેલીમાં વધારો થતો દેખાઈ રહ્યો છે. તાજેતરમાં જ સુમુલ ડેરી દ્વારા લીટર દૂધના ભાવમાં 4 રૂપિયાનો વધારો ઝીંકી દેવાયો હતો.

સરકાર ઝડપથી ભાવ વધારાને પરત ખેંચે તેવી આશા
પુણા વિસ્તારમાં ભૈયા નગરની રહેવાસી વિમલબેનને કહ્યું કે, અમારી સાથે મહિલાઓ ગેસ સિલિન્ડર જાહેરમાં લઈને બેસી ગયા હતા અને ચા બનાવીને પોતાનો રોષ પ્રદર્શિત કર્યો હતો. ચામાં દૂધ નાખ્યા વગરની બનાવીને દૂધના ભાવમાં થયેલા વધારાનો વિરોધ નોંધાવ્યો હતો. સરકાર છાશવારે જીવન જરૂરિયાતની વસ્તુ પર સતત વધારો કરી રહી છે. એક તરફ પેટ્રોલ-ડીઝલના ભાવ આસમાને પહોંચી ગયા છે તો બીજી તરફ જીવન જરૂરીયાતની ચીજોની પણ એ જ સ્થિતિ સર્જાઈ છે ત્યારે આર્થિક ભારણ સતત વધી રહ્યો છે. સરકાર અમારા વિરોધને ધ્યાનમાં રાખીને ઝડપથી ભાવ વધારાને પરત ખેંચે તેવી આશા છે.