પતિ સક્ષમ નથી,તેથી સાસુ પુત્રવધૂને સસરા સાથે શારીરિક સંબંધ બાંધવા દબાણ કરતાં, ના પાડતાં આવી રીતે ગર્ભધારણ કરાવ્યું

પાટણ : શંખેશ્વર તાલુકાના રૂની ગામે કુટુંબનો વંશવેલો વધારવા માટે પોતાનો પુત્ર શારીરિક સંબંધ બાંધવા માટે સક્ષમ ન હોઈ સાસુ દ્વારા પુત્રવધૂને સસરા સાથે શારીરિક સંબંધ બાંધવા માટે દબાણ કરાતું હતું. સસરા પણ છેડતી કરતા હતા. છતાં પુત્રવધૂ તૈયાર ન થતાં અંતે બળજબરીપૂર્વક સાસરિયા પક્ષે ટેસ્ટ ટયુબ કરાવતા ગર્ભ ધારણ થતાં સિમંત કરીને પીયર ગયેલી મહિલાએ પતિ, સાસુ, સસરા અને દિયર સામે શંખેશ્વર પોલીસ મથકમાં ફરિયાદ નોંધવતા ચકચાર મચી છે. દહેજ પેટે પેટ્રોલ પંપ નામે કરાવી લાવવા પણ ધમકી આપવામાં આવી હતી.

અક્ષરશ: ફરિયાદ
વર્ષ 2013માં સમી તાલુકાના સોનાર ગામની યુવતીના શંખેશ્વરના રૂની ગામે સાટાપ્રથામાં લગ્ન થયા હતાં. પતિ શરૂઆતથી જ શારીરિક સંબંધ બાંધવા માટે સક્ષમ ન હોઈ 8 વર્ષના લગ્નજીવન ગાળા દરમિયાન પતિ સાથે એકપણ વાર સંબંધ બંધાયા ન હતાં. પરંતુ સાસરી પક્ષ દ્વારા ઘરમાં વારસ માટે પુત્રવધૂને સાસુ દ્વારા સસરા સાથે સંબધ બાંધવા માટે કહેતાં પુત્રવધૂ ડઘાઈ જઈ પોતાના પતિને વાત કરતા પતિ ઘરની આબરૂ સાચવા અને પરિવારનો વંશ વધારવા માટે કંઈ ખોટું ન હોવાનું કહી પરિવારની વાતમાં સમર્થન આપ્યું હતું.

સસરા પણ છેડતી કરતા હતા છતાં પુત્રવધૂ સંસ્કારોને લઈ સસરા સાથે શારીરિક સંબધ બાંધવા તૈયાર ન થતા અંતે સાસરી પક્ષના લોકો દ્વારા વારસ મેળવવા માટે ટેકનોલોજી થકી સગર્ભા બનવા માટે અમદાવાદ ખાતે ખાનગી હોસ્પિટલમાં ટેસ્ટ ટયુબ બેબી કરાવ્યું હતું. ગર્ભ રહ્યા બાદ તેનો સીમંત પ્રસંગ હતો, તેના એક દિવસ પૂર્વે સાસરિયાં પક્ષ દ્વારા તેના પીયરમા બહુ પૈસા હોઈ પરત આવે એટલે એક પ્રેટ્રોલ પંપ તેમના નામે લખાવી લઈને આવવા માટે ધમકી આપી હતી.

પીયરમાં ગયેલી મહિલાએ હાલ નવમો મહિનો ચાલે છે. બાળકના જન્મ અંગે કોઈ ખોટા આક્ષેપો ઉઠાવવાના ભયથી તેને સમગ્ર હકીકત તેના પરિવારને જણાવતા પરિવારે તેને હિંમત આપતા તેણીએ ઉપરોક્ત તમામ બાબતે શંખેશ્વર પોલીસ મથકમાં પતિ, સાસુ સસરા અને દિયર વિરુદ્ધ પોલીસ મથકમાં ફરિયાદ નોંધાઇ હતી.

પતિ ઘરે ના રહેતો હોઈ શિક્ષક સસરા શારીરિક સંબંધ બાંધવા છેડછાડ કરતા
પતિ પ્રાઇવેટ નોકરી કરતો હોઈ બે-ત્રણ મહિને મહિને નોકરી પરથી ઘરે આવતો હતો. પુત્રવધૂ ઘરે એકલી હોઈ તે દરમિયાન વ્યવસાયે શિક્ષક સસરા શારીરિક સંબંધ બાંધવા માટે પુત્રવધૂની શારીરિક છેડછાડ કરતા હતા તેવા પોલીસ સમક્ષ પુત્રવધુએ સસરા સામે ગંભીર આરોપ કર્યા હતા.

પુત્રવધૂની ફરિયાદ બાદ સાસરીયાં ઘર છોડી ફરાર
તપાસ અધિકારી પીએસઆઇ સહદેવસિંહ સોલંકીએ જણાવ્યું હતું કે મહિલાનું રૂબરૂમાં વિશેષ નિવેદન લઈ જુબાની આધારે પોલીસે સાસરીપક્ષના ચાર ઈસમો સામે ફોજદારી કલમ 154 હેઠળ IPC 498A, 354A, 506( 2), 114 તેમજ દહેજ પ્રતિબંધ અધિનિયમ મુજબ ફરિયાદ નોંધી છે. પોલીસે આરોપીની શોધખોળ માટે ઘરે તપાસ કરી હતી. પરંતુ ઘર બંધ હોઈ કોઈ મળી આવ્યું નથી. આ બાબતે આરોપીઓની અટક કરી ફરિયાદ મામલે વધુ તપાસ કરવામાં આવશે.

મહિલાના ઘરે જઈ નિવેદન બાદ ફરિયાદ લેવાઈ
પોલીસ સૂત્રોના જણાવ્યા મુજબ મહિલા સગર્ભા હોઈ પોલીસ સ્ટેશન જઈ શકે તેમ ન હોવાથી સમી પોલીસ સ્ટેશનમાં વરદી આપી હતી. જેના આધારે બીટ જમાદાર કુલદીપ ભાઈએ તેણીના ઘરે જઈ મહિલાએ જે નિવેદન નોંધ્યું હતું અને તેના આધારે ફરિયાદ દાખલ થઇ હતી. ફરિયાદી મહિલાને જરૂર પડે મહિલા હેલ્પલાઇન નંબર પણ આપવામાં આવ્યો છે.

મહિલાનાં સાટા પ્રથામાં લગ્ન થયાં હતાં, નણંદે પણ સામે ફરિયાદ નોંધાવી
પોલીસ સૂત્રોના જણાવ્યા મુજબ ફરિયાદી મહિલાના લગ્ન સાટા પેટામાં થયા હતા એટલે કે તેની નણંદના લગ્ન ફરિયાદી મહિલાના ભાઈ સાથે થયા હતા. જોકે તેના પિતા અને ભાઈ હાલમાં હયાત નથી તેમના પરિવારમાં સમી અને ગોચનાદ ગામ પેટ્રોલ પમ્પ પણ આવેલા છે જેનો વહીવટ મહિલાની ભાભી સંભાળે છે. તેની ભાભી એ બે ત્રણ દિવસ અગાઉ સાસરીમાં તેને ત્રાસ અપાતો હોવાની ફરિયાદ નોંધાવી હોવાનું પોલીસ સૂત્રોએ જણાવ્યું હતું આ પછી આ ઘટના પ્રકાશમાં આવી છે. પોલીસે બંને કેસમાં સામ સામે ફરિયાદ નોંધી તપાસ હાથ ધરી છે.

ટેસ્ટ ટ્યુબ માટે ઉપયોગમાં લીધેલ સ્પર્મ તેના પતિનું ન હતું
મહિલાએ તેની ફરિયાદમાં જણાવ્યું હતું કે ટેસ્ટ ટ્યુબ માટે તેને ફરજ પાડાઈ હતી જોકે તેના માટે ઉપયોગમાં લેવાયેલ વીર્ય તેના પતિનું ન હતુ પરંતુ કોનું હતું તે એને ખબર નથી.