6 સંતાનની માતા પ્રેમમાં એટલી આંધળી બની કે 14 વર્ષના કિશોરને પતિ બનાવવા ભગાડી ગઇ
દાહોદ: ફતેપુરા તાલુકામાં રહેતી આશરે 35થી 40 વર્ષની ઉંમર ધરાવતી છ સંતાનની માતા પતિના મિત્રના 14 વર્ષના છોકરાને પતિ તરીકે રાખવા માટે ભગાડી ગઈ છે. કિશોરને પોતાની સાથે લઇ ગયા બાદ બંનેને પકડીને પરત લાવતી વખતે સંતરામપુરના બસ સ્ટેન્ડથી ચકમો આપીને તે કિશોરને લઇને બીજી વખત રવાના થઇ ગઇ હતી. શોધખોળ બાદ પણ બંનેનો કોઇ જ પતો નહીં લાગતાં અંતે કિશોરના પિતાએ પોલીસ મથકે અરજી પણ આપી છે.
ફતેપુરા તાલુકાના બે પરિવાર ગાંધીનગર ખાતે એકસાથે મજૂરીકામ કરતા હતા. ત્યારે એક પરિવારમાં 6 સંતાનની માતા એવી મહિલા બીજા પરિવારના 14 વર્ષીય કિશોર પર મોહી પડી હતી. પ્રેમી બનાવ્યો હતો એટલી ઉંમરના તો મહિલાનાં બાળકો છે અને એક દીકરીનું તો લગ્ન પણ કરી દીધું હોવાનું જાણવા મળ્યુ છે. કિશોર અને તેનો પરિવાર કોઇ કારણોસર વતન આવી ગયો હતો, ત્યારે પ્રેમમાં અંધ મહિલા ગાંધીનગરથી એકલી આવીને કિશોરને સુખસર બોલાવી લઇને ગાંધીનગર રવાના થઇ ગઇ હતી.
મહિલાના પતિએ કિશોરના ઘરે જઇને છોકરો તેની પત્નીને ભગાડી ગયો હોવાની જાણ કરી હતી. બંને ગાંધીનગર જ હોવાની જાણ થતાં કિશોરનો પરિવાર 5 દિવસ પહેલાં બંનેને પકડીને બસ દ્વારા ફતેપુરા લાવી રહ્યા હતા. ત્યારે સંતરામપુરમાં મહિલાએ વાકચાતુર્ય વાપરી તેને લઇ જશો તો સાસરી પક્ષવાળા તમારી પાસેથી દાવો માગશે એમ કહીને બધાને બસમાંથી ઉતારીને વાતે વળગાડ્યા હતા.
તકનો લાભ લઇને તે ફરીથી સંતરામપુરથી કિશોરને લઇને રવાના થઇ ગઇ હતી. તપાસ દરમિયાન આ મહિલા કિશોર સાથે પોતાના પિયરમાં હોવાનું જાણવા મળ્યુ છે. જોકે તે કિશોરને પરત ન આપી તેના પતિ તરીકે રાખવા માગે છે.મહિલા કિશોરને પતિ તરીકે રાખવા ભગાડી ગયાની અરજી આવી છે એના આધારે તપાસ ચાલુ છે. કિશોરની ઉંમરના પુરાવા લઇને તેના પિતાને કાલે બોલાવ્યા છે. અભ્યાસ બાદ ગુનો દાખલ કરાશે. – એન.પી સેલોત, પીએસઆઇ
