ભાવનગરમાં ગટર ઊભરાતા તંત્ર સાફ કરવા આવ્યું ‘ને મોટા પ્રમાણમાં કોન્ડોમનો જથ્થો નીકળતા સ્પામાંથી કૂટણખાનું ઝડપાયું

ભાવનગરમાં ચૌ તરફ શરૂ થયેલા સ્પા સ્ટેન્ટરો માંથી કેટલાક સ્પા સેન્ટરોમાં મસાજ કરવાના ઓઠા નીચે દેહવ્યાપારનો ધંધો ધમધોકાર ચાલી રહ્યો છે. આ સ્પા સેન્ટરોમાં અન્ય રાજય અને વિદેશની યુવતીઓને લાવવામાં આવે છે અને થોડા થોડા સમયે તેમના શહેરો બદલી અન્ય શહેરોમાં મોકલી આપવામાં આવે છે. સ્પા સેન્ટરમાં ચાલતા આ ગોરખધંધા અંગે સૌરાષ્ટ્ર સમાચારની ટીમે કરેલી તપાસ દરમિયાન ઘોઘાસર્કલ, વાઘાવાડીરોડ અને સરિતા સોસાયટી ખાતેના કેટલાક સ્પા સેન્ટરોમાં આ ગેરકાયદે પ્રવૃતિ ચાલતી હોવાની વિગતો બહાર આવી છે.

ભાવનગર શહેરમાં અંદાજે 20 સ્પા સેન્ટરો ચાલે છે જેની નોંધણી કોર્પોરેશન તથા પોલીસમાં થયેલી હોય છે. પોલીસ દ્વારા સ્પા સેન્ટરમાં કામ કરતી વિદેશી યુવતીઓ તથા પરપ્રાંતિય યુવતીની વિગતો મેળવે છે તથા સોગંદનામું પણ કરવામાં આવે છે. સ્પા સેન્ટરમાં દાખલ થતા જ એક મેનુ કાર્ડ બતાવવામાં આવે છે જેમાં અલગ-અલગ પ્રકારના સ્પા થેરાપી જેવી કે સાદી સ્પા રૂ. 800 થી 1000, ઓઇલ સ્પા રૂ.1200 થી 1500, જેલ સ્પા રૂ.1500, હોટ સ્પા રૂ.3000 થી 3500, થાઇ સ્પા રૂ.3000 થી 4000 હોય છે. સ્પાના પ્રકારની સાથો સાથ સમયગાળાના ભાવ પણ અલગ-અલગ હોય છે.

સ્પામાં મસાજ દરમિયાન ગ્રાહકોના મુડ અને વર્તન જોયા બાદ તેને ખાસ સર્વિસ કે ‘સ્વર્ગની સફર’ જેવા અનુભવ માટે પુછવામાં આવે છે. ગ્રાહક જો લલચાય તો તેના માટે ભાવ-તાલ જણાવવામાં આવે છે અને તે માટે પાર્ટીશન કરેલી રૂમની સગવડ પણ ત્યાં જ ઉપલબ્ધ હોય છેે. આ માટે રૂ. 2500 થી 5000 સુધીનો ચાર્જ ટીપ સ્વરૂપે મેળવવામાં આવે છે. ગ્રાહક સ્પા સેન્ટરમાં દાખલ થાય એટલે તરત તેના મોબાઇલ, પાકિટ, ચાવી બધુ લોકરમાં મુકાવી દેવામાં આવે છે એટલે બિનદાસ્ત આ દેહ વ્યાપારનો ધંધો ચાલી રહ્યો છે.

ગટર વારંવાર ઉભરાતા ગોરખધંધાની વાત બહાર આવી : ઘોઘા સર્કલ વિસ્તારમાં ચાલતા એક સ્પા સેન્ટરના બિલ્ડીંગની ગટર વારંવાર ઉભરાય જાય છે અને આ ગટર સારૂ કરતી વખતે કોન્ડમનો જથ્થો મોટાપ્રમાણમાં મળી આવતો હોવાનું એક ફલેટ ધારકે જણાવ્યું હતું ગટર વારંવાર ભરાય જતા લોકોને શંકા પડતા આ ગોરખધંધા ચાલતા હોવાનું બહાર આવ્યું હતું આ અંગે દુકાન ભાડે આપનાર માલીકને પણ ફલેટ ધારકોએ જાણ કરી છે.

એક ગ્રાહકને બ્લેક મેઇલીંગનો પણ પ્રયાસ થયો હતો : સ્પા સેન્ટરમાં ચાલતા આ ગોરખધંધા તંત્રવાહકોની જાણ બહાર હોય તે શક્ય નથી. એક સ્પા સેન્ટરમાં માલેતુજાર ગ્રાહકનો ફોટો પાડી બ્લેકમેઇલીંગ કરવાનો પ્રયત્ન કર્યો હતો. જો કે ખાખી પહેરવેશવાળા એજ આ મામલામાં વચ્ચે પડી મામલો થાળે પાડ્યો હોવાનું ચર્ચાઇ રહ્યું છે.

ગ્રાહક ખાસ સર્વિસ માંગે તો આપવાની : નામ નહીં જણાવવાની સ્પા સેન્ટરમાં કામ કરતી એક યુવતીએ જણાવ્યું હતું કે, આ કામ અમે અમારી મજબુરીના લીધે કરીએ છીએ, કોઈ ગ્રાહક ખાસ સર્વિસ માંગે તો તેને આપવી તેવી સુચના હોય છે. અમે અહીં જ રહીએ છીએ.